ZOHRE-AZ WEBLOGINA XOS GELIBSINIZ !

Tuesday, January 24, 2006

كوچري قوش

...........كوچري قوش.................

گله رم دئميشدير كــــوچري بير قوش
سـووشـدو بـو بـاهـار يـئنه گلمــــه دي
تكرار بير گوروشون سوزون وئرميشدي
اونـوتـدو عهــد – ايلقار يئنه گلمه دي

ããããã

بـلكه ده اوچـانـدا يــوردونــا ســــاري
بير نامرد اووچويا توشلانيب ، قاليب
بــلكه ده بــير يــاشيل گوللو بـــوداقدا
يورغونام دئييب دير ، هوشلانيب قاليب

ããããã

دئييره م بـلكه ده اسـير دوشـــوب دور
علاج سيز چيـرپيـنير ده ميـــر قفس ده
هاراي لير اوزاقدان ائلين ، دوستلارين
نه دئيير گوررسن او سـون نفس ده ؟

ããããã

ياخشــي جــا تــانيرام قــارا بــاختيمــي
سينديــرار قــانــادي بــاغلايــار يــولـو
ايـتيـره ر ايـزلـري ، اسديـره ر يئلــــي
باســيرار گــوللــري ، بيــتيره ر كــولـو

ããããã

قـئنايـيم بـاختيمـي گوررسن اي دوست ،
يــوخسا يوللارينــي هئلــه گوزلــه ييم ؟
يئنــي بيــر بــاهارا اومــود اولاركن ،
بــو غــريب يــازيــا بــويــنومــو اييم ؟

زهره . و

Friday, January 13, 2006

آلترناتيو

آ لــتــرنــا تــيــو

انسان ، دوشونجه لر و دويغولار مركزي اولاراق ، اوزونده يوزلر بئله حيسي ياشادير.ان گوزه گلمه ين و ريز حركت لردن تا ان گوجلو و گوزه چارپان ريلكس لر همين دوشونجه لر و دويغولار اوزوندن انسان لاردان باش وئرير.دئمك هر بير نورمال و ساغلام انسان هر بير ثانيه ده اوز ايچينده ياشاتديغي حيس لري ديشاري بوراخيب و نومايشه قويور. عاليم لر ايسه بئله يوزلر حيس ايچينده اونملي لري سئرالاياركن ، اونلارين ايچينده داها اونملي لرين سئرالاييب و سون بولومده انسانلارين ان اونملي گوستري لرين آدلاميش لار . پرفكسيونيزيم ( Perfectionism ) اونلاردان بيري دير .بو حيس ده هر بير انسان اوزونو و اوزونده ياشاتدديغي حيس لري ان يوكسك درجه يه قالديرماغا جان آتاركن ، بلكه بو حيسي مطلق انسان لارا عايد اولان بير حيس حدينده اوزللتميش دير.مثال ايچون هربير انسان سو ايچمه يه گره كير . بو ايسته ك هر بير حئيوان و هر بير بيتگي يه عايددير . بو عوموم ايسته ك اوزه ل اولا بيلير آنجاق اوندا كي بير انسان سويو ان ساغلام شكيلده ، ان دوغرو زامانيندا و ان دوزگون فورماسيندا ايچسين . آمما بير پارا حيس لرواردير كي تكجه انسانا عايددير. مثال ايچون انسانلار گوزه ليي سئويب و اونو چئوره سينه داشيماق ايچون هر نه يي قوللاميش لار . بير تولكونون يوواسيندا قالي يا ديوار شكيللري گورونمور آمما انسان لار باشارديق لاري قده ر حيات چئوره سين گوزللنديرمه يه چاليشيرلار . و تامام بو اوزه لليك لر همين پرفكسيونيزيم اوزوندن دير . پرفكسيونيزيم و يا كمال آختارماق و سون درجه يه ال چــاتماق ، انسان لاردا بير دئيشيك حركت يارادير . بو اوزدن انسان لار [ اختيار ] ماليكي اولماق لا اوز اينانديق لاري آلاهي يئرلره _ فيكيرلره – مقصدلره – آماج لارا – اينام لارا....چاتماغا يورويوب و بو يول دا اونا [ مانع ] لري هئچ ايسته مزلر . پرفكسيونيزيم ده يئنه بولوم لر وار و اونلاري سئرالاماق لا بــــو اساس دا گئــــده ن اوستـــون حيس دئمه ك اوستون طلب ( ترجيح قوي ) گئدير .
مثال ايچون بير شخص تاريخ – جوغرافي و شعر ماتريال لارين هربير حالدا سئوير .آمما بير گون بير قاطاردا اوچ يولچو آراسيندا اوچ كيتابي گوتورمه يه مجبور قالير و او شخص جوغرافي كيتابين گوتورور . دئمه ك جوغرافي اونون اوستون طلبي دير . اوستون طلبي زورلاماق و بير شخصي بير ديگر ايسته ديي قونويا سالماق بو گون ايسه پسيكولوژو علمينده كامپولوزوري (compulsory ) آدلاناركن پولتيك علمينده اونو اوبليگاتور (obligatory ) آدلايرلار . بو فعل منفي فعل لردن اولاراق هر ايكي علم ده منفي يئر توتور . بير انساني اوز اوستون ايسته ييندن ال اوزمگه گوره زورلاماق و ها بئله بير انسان لاردان دوزلينه ن توپلومو اوز اوستون ايسته ك لريندن ال اوزمه يه گوره زورلاماق ، مطلق پيس و منفي بير عمل سانيلير.و ها بئله دير بير كس يا بير توپلومو اوستون ايسته ك لرينه گوره هدله مك ان منفي عمل سانيلاركن دونيا اوزونده گئده ن بين الخالق قانون لار چرچيوه سينده [ قاداغان ] حسابلانير . ان ساده سي بير انسانين ايسته يينه چاتماغا مانع لر تورتمك و ان گئنيش حالدا بير توپلومون بير ايسته يي اوستون توتماغينا مانع اولماق قاداغان دير و عيني حالدا بير ديگر ايسته يه ساري زورلاماق دا دوز ساييلمير . و اگر بير توپلوم بير ديگر سوزه ايسته ك و ماراق گوسترمير بو باره ده اونلاري سوچلاماق اولماز و اونا سورغو يوخدور .
آنجاق پولتيك عالمينده آلترناتيو دئيله ن همين سوزدن آسيلي دير . دئمه ك بير توپلوم نئچه قونو آراسيندا بير قونونو اوستون توتما ق لا نه باشقا قونولاري مطلق رد ائدير و نه اوستون توتدوغو قونودان ال اوزور . ( دقت ائدين كي بو مبحث مصاله و سازش له فرقلي دير ) . مثال ايچون آمريكا و آوروپا آرسيندا آوروپاني سئچمك آمريكاني مطلق رد ائتمك دئييل . آوروپا و آسيا آراسيندا آسياني سئچمك آوروپاني رد ائتمك دئييل . ايران و آلمانيا آراسيندا ايراني سئچمك آلمانياني رد ائتمك معناسيندا دئييل . كرمان و آذربايجان آراسيندا آذربايجاني اوستون توتماق كرماني رد ائتمك دئييل . تبريز و يزد آراسيندا تبريزي توتماق يزدي يئرلي رد ائتمك سوزو دئييل . ........
و ها بئله دير ميللي حيس لرده وطن سئومك – ائل سئومك – خالق سئومك ديگر اولكه لر – ائللر و خالق لاري رد ائتمك معناسيندا گئتمير . بو حالدا نه بير انساني اوز خالقيني سئوديي اوستونده محكمه يه چكمك دوغرو گورونور و نه بير توپلومو اوز خالقيني اوستون توتماق سببينه هده لمك دوز گورونور . آلترناتيوي دوشونمه ين كس و اونا بويون اولمايان بير كس و يا تشكيلات بئله ، نورمال و دوغرو معنالارا ماليك اولان بير كس يا تشكيلات سانيلمير. آنورمال و سهو كار كس لر ساغلام حسابلانمير و اونلارين دوشونجه سي ده تابي كي ضرر يارادان اولا بيلير .
بو علمي و اساسلي فاكت لار اوزوندن ، بــو گــون آذربايجان خالقي ايـچينده گـئده ن اوستون طلب لر ميللي ايسته ك لر اوزوندن نه تك باشقا خالق لارا و باشقا ايسته ك لره قارشي حسابلانمير بلكه بير ساغلام خالقين ساغلام ايسته ييني اعلان ائدير . اونا قارشي دورماق و اونو ياوا – ياوا تهمت لرله هده لمك بلكه بير پارا منافعي خطره دوشه ن كس لر ساريسيندان ، اونون دوغرو وارليغيني و ساغلام اساسيني محو ائتمك مقصدينده دير و بو همين قاداغان فعل لردن حسابلنير . و اينانديغيميز كيمي بو قرار غرض لي دوشونجه لر هر بير طرفه چوخلو ضررلر يارادا بيلير .

زهره وفايي

www.zohre-az.blogspot.com
zohre_az@yahoo.com