آنا دیلینده اولان معجزه

آنا دیلینده اولان معجزه

محمد حسین بهجت 1285 گونش ایلینده تبریزده آنادان اولدوغو ایللرده ، تبریز و دیگر آذربایجان یئرلری چئتین بیر دورومدا یاشاییردیلار . آغیر دونیا محاربه لری بیر طرفدن و آذربایجانین باشینا یاغان بلالر هر بیر طرفدن ، او ایللرده مین لر آذربایجانلی نی یوردونو ترک ائتمه یه مجبور ائدیردی . محمد حسین بهجت بئله بیر دورومدا تبریزدن خشگناب کندینه کوچوب و اورادا اوشاقلیق گونلرین سووماغا مجبور قالیر . آنجاق بو گونلر اونون یارادیجیلیغینا ان بویوک بیر تمل کیمی اولور و سنه لر سونرا اونون ایزی شهریار آدلی بیر شاعیر اثرلرینده آیدین جا گورونور .
محمد حسین بهجت خشگناب دان سونرا یئنه تبریزه گلیر و متحده و فیوضات مکتب لرینده پهلوی نین یاراتدیغی فارس بیر شوونیزیم چرچیوه سینده نه تک دیلینی بلکه ائل – اوباسینی ، تاریخ – مدنیتینی ، و یوزلر دیگر وارلیغینی دانماغا مجبور قالیر . بئله بوغونتولو ایللرده بهجت آدلی گنج بیر شاعیرین سوزلری فارسی یازیلماغا مجبور اولاراق ، شعرلرین سوژت لری ده ها بئله شوونیزیم زورلاماسینا گوره ایره لی آتددیم آتا بیلمیه ییر .خصوصی له شاه قوشونوندا ایشله مه یه باشلادیغی حالدا آغیر بیر محصوریت ده قالیر و اونا گوره ده بو ایللرده قوشدوغو شعرلر نه تک فارسی دیلینده دیر بلکه معنالاردا ها بئله بیر سئخ ایلیشگی له او دورون شونیزیم سیاستینده گورونور . عشق و عاشقی ده ، خصوصی له یازیلان شعرلر نهایت تخت جمشیدین 40 بیت لیگ تعریف شعرینه یازیلماغا گلیب و دوشور . داها بئله دوشونجه لر ایچینده شهریارین ائل و عائله سی ، آتاسی و آناسی ، خشگنابی ، صابر و شیروانی سی ، اقبال آذر و تبریزی ..... بیر او قده ر اوندان آرا آچیر کی اوزو دئمیشکن : کم کم پدرم خدا بیامرز دیدم سر کوه رسته چون کاج
چون بال ملک عبایش افشان دستار سیادتش به سر تاج
وز کوه همی شود سرازیر چون نور محمدی ز معراج
دیگر مگرش به خواب بینم ...................

تهران دا یاشادیغی گونلرده ابوالحسن خان شیدا – شمس العلما – ملک الشعرا بهار – محمد علی ترقی – فرخی یزدی – عشقی – صادق هدایت – رضاخان هندی – درویش – نیما – سالار معتمد – کمال املک – حبیب سماعی .... و اونلار دیگر بئله آدلیم صنعت کار آمما مطلق پان فارسیسم یولوندا چالیشان صنعت کارلار جمعینده ، بهجت شاعیر ، شهریار شاعیر ه آد دئیشیر آمما دوغروسو هئله ده بیر اوزه للیک و یئنی لیک مالیکی دئییل و دیگر یازیچی و شاعیرلر کیمی نه تک گئییم ده ، دورانیش دا ، سوژه لرده بئله ، بیر گلیشه دولوسو فورمادا یاشاییر و گونو گوندن آتا بابادان قالدیغی آغیر وارلیق لاری ایتیرمه ک یولوندا داهادا ایتی گئدیر . آنجاق بو یول آزقین لیغی گرچک حیاتیندا اولسادا ، شاعیر یوخو و غیب عالم لرده یئنه ده ایتیردیی یولو دوشونور و دیله گلیر :
سر دو راه رسیدیم و سرنوشت این بود برو پدر تو از آن سوی و من از این سویم
برس به دادم و این بند زانوان بگشای به روز وعده که جان میرسد به زانویم
به شهر خویش اگر شهریار شیرین کار به شهر غریب همان سائل سر کویم
بو آزقین لیق و یا دیگرگین لیک 1331 ایلینه کیمی داوام ائدیر . شهریارین آناسی بو ایلده وفات ائدیر . اونون وفاتی شهریارا آغیر بیر حوزون و غم یارادیر . آنجاق بو حوزون هامولار کیمی آنا اولوموندن دئییلمیش . شهریار اوز کوکونو دونیادان و یئر اوزوندن قیریلمیش و قورتولموش گورور . اونو بیر دهشت چولقاییر : ( من کیمه م ؟ ) سوزونو دونه – دونه دیله گلیر . آنادان آیریلماغی ، عینی وطن دن – دیل دن – مدنیت و کولتوروندن – بیرجه سوزده ( کوتوک دن ) قیریلماق گورور . الی و آیاغی هر یئردن اوزولوب ، اوزونو یئر ایله گوی آراسیندا آغیر بیر بوشلوق دا گورور . بئله بیر دوشونجه لر اونو اوزونه گئتیریر . نئچه ایل غفلت یوخوسوندان آیریلان لار کیمی بیر ایل دن آرتیق هئچ نه یازیب و دئمه ییر . بیر ایل دن سونرا تهرانین پاییزلی بیر گئجه سینده آناسینی یوخودا گورور و اوندان حلال لیق ایسته ییر . همین گئجه شهریار حیدربابا پوئماسی نین ایلک بولومون اصیل بیر عاشیق لارین قوشما وزنینده و اصیل بیر تورک دیلینده یارادیر .
آذربایجان خالقینین بو پوئمایا گوستردیی ماراق و ایسته ک بیر او قده ر یوخاری و غریبه دیر کی شهریار اوزوده اونا حیرت قالیر . ائل قوجاغینا دونموش بیر سورگون کیمی ، شهریار بو ایللرده تبریزه دونور و اوزو دئمیشکن : یئنی بیر حیاتی ساعاتین ضربه لری له باشلاییر . ( تبریزین بلدیه ساعاتی ضربه لری ) . آنجاق اوز وطنینده یازیب و یارادان شاعیر و یازیچی دا هئچ آز دئیلمیش ! اونلار سهند کیمی باشینی بولوت لاردان آیرماییب و هر آن اوجا باش ایله و آچیق آنل ایله وطن قایغیسینا قالیب و اوز آنا دیللری کئشینده دایانمیش لار . شهریار بو سئرایا قوشولماق دا ایتیردیی کوکونو تاپیر و حیدر بابانین ایکینجی حیصه سینی تبریزده یازیر ( 1332 ) .
بو شاه اثر شهریاری دوغروسو ائلینه بیر شهریار ائدیر و آنا دیلینین معجزه سی بوردا گورونور . حیدربابا اثری مین لر کس واسطه سی له ازبرله نیر ، اوخونور ، اون لار دیگر دیله چئوریلیر ، نومایشه یازیلیر و آذربایجان تورکجه سینده بیر دونوم نوقطه سی کیمی یئر آلیر . بو تاریخ دن سونرا شهریارین یازدیغی تورکجه شعرلر بیری بیریندن گوزه ل و معنالی دیر . بو ، شهریارین روحونون آلدیغی صیقلی گوستریر تا نهایت اونو دوغولدوغو گون کیمی اصیل بیر آذربایجانلی گوروروک . شهریار اوز عزیز و ده یرلی عومرونو بو تجربه ده قویماق لا هامویا گوستردی کی ( کوک دن قیریلماق ایسته مه ین لر گره ک کی آنا دیل دن قیریلماسین لار ) .
حیدر بابا ایلدیریم لار شاخاندا سئللر سولار شاققلداییب آخاندا
قیزلار اونا صف باغلاییب باخاندا سلام اولسون شوکتیزه ائلیزه
منیم ده بیر آدیم گلسین دیلیزه
حیدر بابا کهلیک لرین اوچاندا کول دیبیندن دوشان قالخیب قاچاندا
باغچالارین چیچک له نیب آچاندا بیزدن ده بیر ممکن اولسا یاد ائیله
آچیلمایان کونول لری شاد ائیله
حیدر بابا ایگیت امک ایتیرمز عومور گئچر افسوس بره بیتیرمز
نامرد اولان عومرو باشا یئتیرمز بیزده والله اونوتماریق سیزلری
گورمه سک ده حلال ائدین بیزلری
حیدر بابا قورو گولون قازلاری گدیک لرین سازاخ چالان سازلاری
کئت– کوشه نین پاییزلاری– یازلاری بیر سینما پرده سی دیر گوزومده
تک اوتوروب سئیر ائده رم اوزومده
حیدر بابا کندین گونو باتاندا اوشاقلارین شامین یئییب یاتاندا
آی بولوتدان چیخیب قاش گوز آتاندا بیزدن ده بیر سن اونلارا قصه دئه
قصه میزده چوخلو غم و غصه دئه
قصه میزده چوخلو غم و غصه دئه .......

زهره وفایی - تبریز