ميللي حركت ده اولان فازلار

ميللي حركت ده اولان فازلار

بير فيكير،تئوريك اولاراق بير نئچه فاز و سئرايا ماليك دير.همين فيكير پراكتيك دورونه گئچنده فازلاري داها آرتيق سئرالانيرو هر بير فاز دا بير نئچه ديگر فازي آچماق اولور.وچوخ يقين كي همين بو فازلاردان يئني فازلار دوغولور.ميللي حركت ده فاز نه دير ، هر بير كسه بللي اولاراق مختصرجه بير ايضاح وئريلير.
فاز آنا جريان دان دوغولان نورمال قوللاردير كي همين آنا جريانين اوزه ليك لرين دن بيريني و يا بير نئچه سيني داشياركن ، اوندان آيريلماييب و ايره لي گئتمه يي همين اوزه ل يولدادير.مثال ايچون بير آلما آغاجي كوتويوندن آيريلان قول– بوتاق لار، قول– بوتاق آدلاناركن، آلما آغاجي كيفيتيندن اصلا آيري دئييل لر و اونا گوره ده يارپاق لاري و مئيوه سي مطلق آنا كوتوك كيمي دير.ويا بير الكتريك لنت بلكه آنا لنت دن آيريلان اونونجو و يا يوزونجو لنت دير حالبوكي اونون داشيديغي الكتريك قوه سي آنا لنت ايله هئچ فرقلي دئييل.
ائيله سه ميللي حركت بير آنا كوتوك اولاراق ، نورمال حالدا اوندان نئچه فازلار يارانا بيليرو بو يارانماق لار نه تك ميللي حركت دن اوزاقلاشماق دئييل بلكه عكسينه اونو ياشادان فازلاردير.آنجاق ميللي حركت اوزه ل بير حركت اولاراق اونون فازلاري دا اوزه ل اولمالي دير. ميللي حركتين ايلك تملي مدني حاق لار و ايسته ك لر طلبينده قورولموش اولاراق ، اونون سون قوللاري دا بئله همين حاق لار و طلب لر گوجلنديرمه سي اولمالي دير. بو فاكت اوزوندن هر هانسي بير طلب بو حاق لاردان سواي بير سوزو و ايسته يي مئيدانا آتارسا ، او ، فاز و قول – قانات يوخ بلكه قيريق و آيرينتي دير . ايندي سه ميللي حركت ده اولان فاز لار نه دير ؟ ادبي فاز : بو فاز اساسلي بير فاز اولاراق مين لرجه شاعير – يازيچي – اوخوجو – تدقيقاتچي..... اوزونه آلير و داواملي حالدا سنه لردير آذربايجان حركت لرينده اونملي بيررول اوينايير.آنجاق ايه ربو فاز بير زامان لار تكجه شعر چرچيوه سينده قالميش دير بو گون ده رين و ده يرلي تحقيق لر و لازملي آراشديرمالار و آيدين لاتمالار لا ، چوخ گيزلي نوكته لري آچيب ، ياراتميش دير.
هنر فازي : بو فاز گوركم ده ايلك فاز اولاراق اصيل ده يوزلر ديگر فازي اوزونده ياراتميش دير.موسيقي(عاشيق–اركسترا–اوزه ل گروپلار– اويرتمه سي – اوشاق موسيقي سي.....)رسامليق( قالي صنعتينده– داش قازمالاريندا- تاختا – گون ...ايشلرده )رقص(گروپ لار–اوزه ل رقص لر–اوشاق رقص لري– اشتراك لار – اويرتمه لر...) كاريكاتور–هيكل توكمه ......و اون لار ديگر فاز.
مناسبت لر فازي : بوفازپراكتيك اولاراق هربيرلازملي مناسبت ده يوزلر شخصي كونوللو حالدا و مختلف يئرلرده توپلاييب و حركتي بير ديري و حيات دا اولان حركت كيمي جلوه لنديرميشدي.
اكونومو فازي: بو فا ديگر فازلاردان ضعيف اولماسينا باخماياراق ، يئني يوللار تجربه سي كيمي حركت ده گورونور.هربيرحركت چي بو فازين نه قده ر لازملي اولماغين دوشونه ركن اونا بير شكيل وئرمه يه چاليشماق دا گورونور.
سياسي فاز : بو فاز ، سياست نه دير سه دوغرو بير ايضاح وئريلمه مسينه گوره ، هربير فازدا داخل اولوب و بلكه ده ديگر فازلاردان اوستون توتولاركن ، هر بير فازين چاليشقاني اوزونو سياسي فازدا تصور ائديب و اصرارلي اولوب دور. حالبوكي ميللي حركت ده سياسي فازدا اولماغين شرط لري واردير و تكجه ايدعا ايله بو فازدا اولماق ثابت اولمور.
ايدمان فازي : داغچيليق بو فازين اونونده گئده رك ديگ ايدمان لارداميللي حركت ايسته ك لري ها بئله يول آچيب و ديله گلير.
صنعت فازي : حركت چي صنعت كارلارالي له آچيلان بوفاز، باشارا بيليب نه تك عادي وطنداش لارايچينده بلكه ديگرشهرلرده واولكه لرده ميللي حركت تمثيل چي سي اولاراق ، حركتي دوغرو تعريف لنديرسين.
تحصيل فازي : بو فازدا ميللي حركته اويقون اولان دوروم لاري تانييب ، بللي ائدركن ، طلب لر داواميندا ، چئشيدلي تحصيل يئرلري و يوللاري و امكان لاري حركت چي لره ياراتميش دير.
بين الخالق فازي : بو فازدا ميللي حركت اوزونو ديگر حركت لره و ها بئله دونيادا اولان علاقه لي مركزلره بيلديرمه ك ايچون ، مختلف قوللار آچميش دير. اساس قولواولكه دن كنارياشايان حركتچي لراولان بو فاز، سوز بيرليك سيز آمما جدي ، بو فازي ايره لي سورموش لر.
اوشاق فازي : حركتين داوامچي سي اولان اوشاقلارا اونم اوزوندن ، اونلارا بير فاز آچماق لا ، اشتراك امكاني وئريروديگر فازلارادا بو باره ده بير قول آچماغي تكليف ائدير.
اويرنجي فازي: بوفاز اويرنجي حركت چي لري توپلاييب و اون لاري ايش بيرلييه گئتيرمه يه گوره ديگرفازلاردان داهاسورعت لي وداها دقيق اولموشدو.گله جك ده اوخوموش و بيلميش انسان لارا نه قده ر احتياج گورونور، بو فاز اونم يارادير.
توپلوم لار فازي: سيخينتي لارا باخماياراق هربير آديله بير توپلوم يارادان بو فاز ، حركت چي لرين بير بيريله ياخين لاشماسي و آنلاشماسي نه قده ر يئرلي و لازملي دير ، باشا دوشوب و هر بير امكان دان بو باره ده فايدالانميش دير .
يايين فازي : بو فاز ده رگي لر– بيلديريش لر– جزوه لر– ژورنال لار– سفرلر – راديولار و ديگر وسيله لرله يارانميش دير . چوخ ده يرلي اولان بو فاز ميللي حركت ايسته ك لرين ان اوزاق يئرلره كيمي بئله آپارميش دير .
ديازپورا فازي : آرتيق سايي دا ميللي حركته ماراغي اولان ديازپورا جمعيتي بو فازي ياراتميش و بير قول كيمي ياشاتماغينا چاليشميشدير.
مذهب فازي:بو فاز آشيري دوشونجه لري،هربيرسمت دن اولورسا،ردائتمه ك له ، گرچك لري اعلان ائتمه يه و اونون يئريني اينام لاردا ثبت ائتمه يه چاليشميشدير. ( نوحه شاعيرلي ادبي فازدا – روحاني لرين باغلانماسي سياسي فازدا – مسلمان لارا يارديم گروپ لاري توپلوم لار فازيندا.....)
قادين فازي : قادين لارين رولونو آذربايجانين اصيل مدنيتي ساياق ياراتماق و ياشاتماق مقصدينده اولان بو فاز ، مسئله نين اصيل مدنيت دن چوخ آرا آچماغينا باخماياراق ، اونو يئني دن ياشاتماسينا گوره يارانميش دير .
يئني لشمه فازي : زامان طلب لري اوزوندن ، بو طلبي اوز ايسته ك لرينه قاتان حركت ، يئني لشمه يي آذربايجام مدنيتي له اويقون لاشديرماغا چاليشميش دير.
آنجاق بو فاز لار بير كوتان آغاج دان دوغولان قول بوتاق كيمي سايماق لا باشا گله ن دئييل و اونلاري بير به بير ايضاح ائتمه ك آرتيق زامان طلب ائدير. بلكه ده اوزاق دان باخان لاري و يا خود حركته يئني قوشولان لاري سهوه سالان ، بو چئشيدلي ليك دير . يوخسا حركت آيدين بير سوز اولاراق بير انسان ايسته ك لريني هربير ساحه ده گوز اونونه آليب و اونلارا حورمت له ياناشاركن اونلارين ياشاتماسيني اوزونه بير مقصد كيمي توتموشدور. بو ياناشمادا ميللي حركت بعضي آشيري حركت لر كيمي تكجه اوزونو يوخ بلكه ياناشي خالق لار و ديگر انسان لاري دا نظرده آلميشدير. آنا كوتوك دن آيري اولان فيكيرلره يول وئرمه ين بو حركت بلكه بعضي لرساريسيندان بيرغير دموكراسي و يا دموكراسي له ضد اولان بير حركت دئييلسين . حالبوكي دموكراسي ميللي حركت ده ان دوغرو معناسيندا گئدير و او « هرنه و هر كيمسه اوز يئرينده اولمالي دير و ديگر يئرلر بوش قالسادا بئله ، اونا گئچمه ملي دير .» و « هئچ كيمسه هئچ بير فازدا هئچ بير كيمسه نين يئريني دار ائديب و يا توتماميشدير . بلكه بو هر بير كيمسه نين اوز باشاريسي دير كي اونا يئر بللي ائدير و يا عكسينه باشاريسيز اولماغي دير كي اونو يئريندن قوغور . » ميللي حركت اونا اينانان لارا اويرتميشدير كي آنا فازدان آيريلماق و قيريلماق ، اولوم قده ري آجي و قاييتماغا امكان سيز دير. آتديم لاري بير به بير و بيلدييميز يوللاردا و چيخاريميز اولدوغو سئناق لاردا آتارساق ايه ر ، هئچ بير آتديم بوشا گئتمه يه جك . زامان وار اهمال يول آلان لار تله سيب قاچان لاردان ساغلام و تئز مقصده چاتارلار.زامان وار بير فازدا داواملي چاليشان شخصين ثمري ديگر بيريندن كي اون فاز دا آتددا – بوددا چاليشير داها چوخ دور . آنجاق مقصد اونودولماسا ، آنا كوتوك اونودان دئييل.
زهره وفايي
www.zohre-az.blogspot.com
zohre_az@yahoo.com