ZOHRE-AZ WEBLOGINA XOS GELIBSINIZ !

Saturday, July 09, 2005

ميللي حركت دن ميللي مدافعه

ميللي حركت دن ميللي مدافعه

يوزلر شخص و مركزلر واسطه سي له زوم آلتيندا قالان ميللي حركت بير ايناملي حال دا اوز داوامينا چاليشير و جان آتير . ميليون لار حركت چي دن عبارت اولان بو حركت نورمال اولاراق هر آن بير چيرپينتي و بير مانع له قارشي لاشير .آنجاق مانع لري بير به بير باشدان آشماق و يئني بير يول دا يئني بير مانع لره راست لاشماق حركت چي لري يورمايير و عكسينه يئني قوه لري هر بير يول دا بو يولچولارلا اشتراك وئره رك ، حركت چي لرين سايي گونو – گوندن آرتماق دادير . آكتيو حركت چي لرين سايي بو يول دا آرتيم گوسترديك جه ، ايه ر كي بير تهرله اوميد وئريجي دير ، ديگر تهر ده باخيرسان كي ميللي حركت ده بير پارا اوزگون لوك لر ياراتماقدادير . پولتيكال چرچيوه ده ( سايي ) معنا وئرمه يه رك بو ساحه ده ان اونملي اولان ( چيخار ) دير . اونا گوره ده آكتيولرين آرتماسي بلكه ميللي حركت ده پروبلم لر ياراتماغا آرتيق يونه لير تا قول اولماغا . بو معنا دئيشيك ليك لري دونيا پولتيك عيارلاماسي له ميللي حركت آراسيندا ، همين حركتين اوزه ل اولماغيندان آسيلي دير .
ايللر بير پارا ( ترس ) كس لر ساريسيندان سورونان ( هاني بس سيزين تئورونوز ؟) و يا (هاني بس سيزين باشدا اولان آكتيولريز ؟ ) سورولار ، بو گون باشقا بير نوع دا مئيدانا گلير و هئچ دخلي اولمايان و ياهالتجي حالدا آرايا آتيلير . بلكه خود ميللي حركت بو سورولارا جاواب اولور آمما ترس دئديين كس لر آرتيق حركتي ضعيف لتمه ك آماجيندان ، سوزو آلماييب و يئني دن تكرار و تكرار ائتمه يه چاليشيرلار . حالبوكي اوزه ل اولان بير حركت ده ، تئوري كاغيذدا يازيليب مئيدانا گله ن عمل لر يوخ ، عكس اولاراق اونجه مئيدانا گليب و عموم ساريسيندان تصديق اولاندان سونرا تئوريه چئوريله ن سوزدور . و عيني حالدا آكتيو و باشچي اولان كس لر اوز ادعالاريله يوخ بلكه عموم راي و باخيميندان بللي اولونور و بو بللي ليك سنه لر سورور و سايي سيز سئناق لار آشيرمادان سونرا اولور .
دوغروسو آذربايجان خالقي گئچميش ده باشدان آشيرميش سايي سيز بلالري گوز اونونده توتاراق ، هرنه دن اونجه تاريخ عيارلاماسيني حركت ده بير آگزيوم ( محور ) كيمي توتور . عموم ايسته ييندن خبرسيز و عموم اينام لاريندان اوزاق اولان كس لر ساريسيندان يازيلان تئوري لر ، داها بوگون خالق ايشينه گلمير . سنه لرجه استول داليندا و دينج اوطاق دا يازيلان يوللار بو گون ده يرسيز اولماغي خالقا آيدين دير .هر گون و هر ساعات سايي سيز چئتينليك لرده و مانع لرده خالق ايله برابر اولان آكتيو بو گون خالق عموم تصديقيني قازانميش دير . بو برابرليك مطلق ( حضور ) باخيميندان يوخ بلكه ( اشتراك ) باخيميندان دير .
پولتيك حربه لريندن بيريسي سورو مئيدانا بوراخماق دير . اونون عموم سوزلويو (charged question)آدلاناركن ، بو حربه ده بير پارا ياهالتجي سورولاري مئيدانا گئتيرمه ك له ، بير طرف دن حركت چي لرده شبهه ياراتماق مقصدي گئديرسه ، ديگر طرف دن حركتي اوزمه يه چاليشماق گورونور . مثال ايچون ( هاني بس سيزده تشكيلات لار ؟ ) سوروسو ، ايسته ر – ايسته مز بير پارا كس لرده ( دوغرودور ! بير تشكيلات ماليكي اولمالييق ! ) ايناميني يارادير . حال بو كي ميللي حركت بير اوزه ل حركت اولاراق بو گون اوندا تشكيلات معنا وئرمه يير . نه دن كي :
1 – ميللي حركت اوزو بير تشكيلات دير و بير تشكيلات ايچينده يئني بير تشكيلات قورماق ممكن دئييل .
2 – دئيله ن تشكيلات ( قول ) و ( بوتاق ) معناسيندا اولماديغينا گوره ، يقين پارچالاماق مقصدينده دير .
3 – تشكيلات قورماق ( نفر ) تاپماق دان آسيلي دير و بو ايش هر نه دن اونجه ( باند بازليق ) سئراسينا گئده جك . بير نفرليك ( طيف ) لر و بير نفر ليك ( پارتيالار ) همين سهو دن يارانير !
4 – تشكيلات ايچينده هر نه دن اونجه ( مرام نامه ) و ( اساس نامه ) اولمالي دير . و يئني بير مرام و اساس ياراتماق يا ميللي حركت دن پارچالار آييرماق لا اولاجاق و يا قارشي اساس لارا سويكنمه ك دن ياراناجاق دير و هر ايكي سي حركته قارشي ساييلير .
5 – تشكيلات اولدوغو حال دا ، ميللي حركت دن بالا مقياس دا اولدوغونا گوره ، بير انگليس مثلي اوزوندن (( اون سيچان بير تووشان دان توتماغا و يئمه يه داها ياخشي دير ! )) يقين اولاراق ( آل – وئره ) داها دوغرو ال وئريش لي دير و بو حركته ان آغير ضربه حسابلانير .
6 – تشكيلات لار يارانديغي حال دا كيم لر ادعادا وارديلار ، ( زوم ) ائده ن مركزلره داها راحات و داها آيدين يوللاري آچيب و آكتيولري مئيدان دان چيخارتماغا ايش لري داها سهل ائدير .
7 – تشكيلات لار يارانديقجا ، يالانچي ياناشمالار آرتيب و نهايتا ايش بيرليك لر ، قارشي ليغا چئوريله بيلير .
8 – تشكيلات لار سئچيلميش و اوزه ل كس لردن قورلدوغو حال دا ، عموم خالق يئنه ده حركت دن ايراغا سورولمه ك ده اولاجاق دير .
9 – عموم فيكريني و آكتيولر فيكيريني تشكيلات قورماغا ياهالداركن ، ميللي حركت اساس لاري ياددان چيخيب و بير دوغرو يول دان يوزلر سهو يول آيريلاجاق دير .
10 – قورولان تشكيلات لار سهو اساس اوزوندن بير به بير داغيلديق جا يئني بير سورو و يئني بير سوز ( گوردونوز ؟ سيز ايش بيرليك ده باشارا بيلمه دينيز ! ) مئيدانا آتيليب و حركت چي لري مايوس ائتمه يه چاليشمالار گورونه جك دير .
بو فاكت لارا باخين جا ، بو گونكو ميللي حركت دن بير ميللي مدافعه يارانماسي لازملي گورونور .ميللي حركت باشدا اولان دموكراسيه ايناناراق هرنه فيكيره يول وئرير سوز يوخ ، آمما بو يول وئرمه آنارشيسم له فرقلي اولماغي بيلينمه لي دير . ائيله سه ميللي مدافعه اونجه ميللي حركتي اوزه ن ، هر كيمسه يه و يا هر مركزه بير حددي بللي ائتمه لي دير و بو حددي آشان ، آشيري بير كس اولاراق ، تابي كي دموكراسي له باغلانان حركت ده ، يئرسز اولمالي دير . حركتي پارچالايان – حركت ده ياراشيق سيز ( بدعت ) لر قويان – حركتي تنيك جلوه لنديره ن – حركت دن اوز خئيرينه و آد قازانماغينا فايدالانان – حركت چي لري بير ماتريال گوزوندن گوره ن و اونلاردان بو قرار فايدالانان – حركت چي لر ساريسيندان غريبه ايسته ك لري عنوان ائده ن ...... و نهايت حركتي اوز دوزگون و ساغلام يولوندان چاشيران هر بير فيكير و هر بير شخص و ..... ميللي مدافعه ني اوز برابرينده گوره رك ، بونا يقين اولسون كي ميللي حركت سنه لر آجي سيني چكديي زورباليق دان قاچاراق هر نه زورباليغا اوره ك دن يوخ دئيير .
ائيله سه ميللي مدافعه ، ميللي حركته دايانان هر بير ترس سوزو و هر بير ترس يولو آيدين لاداراق ، حركت چي لري بير قراردا يولون داوامينا چاغيرمالي دير . ميللي مدافعه هر بير آرايا آتيلان سورونو و تكليفي دقيق جه آناليز ائديب و آراشديريب و دوغروسو نه دير ، ميللي حركته بيلينديرمه لي دير . ميللي مدافعه نين سيلاحي دوشونجه و هر طرف لي بيلگي اولاراق ، دئمه ك ميللي حركتين پولتيك قولونون ايلك بيناسي اولا بيلير . نه دن كي داها بوگون ميللي حركت بير چاي – بير چشمه يوخ ، بير چيرپينان دنيز دير . و بو دنيز ، دنيز لر ساياغي زير – زيبل لري قيراغا آتاركن ، درر – گوهرلري باغرينا باسير . بو دنيره قوشولماق ايسته ين لر دنيزين هر بير قطره سينه اينانمالي و بير قرار اولمالي ديلار .

0 Comments:

Post a Comment

<< Home