قونشو قمرتاج خانيم

قونشو قمرتاج خانيم

سنه لر اونجه آناسي قمرتاج خانيم اولان قونشو قيزي ، نيم تاج خانيم لا، بير توي دا راست لاشديق . اوشاقليق دونياسيني يئني دن تاپميش كيمي هر ايكيميز سئوينج دن نه ائتمه يي بيلميرديك . گئچميش خاطره لري تر – تله سيك سايماغا باشلاديق . آنجاق زامان ، بيزيم خاطره لره سئغمادي . ( بيزه گل ! بير ايله شيب دويون جا دئييب – دانيشاق .) نيم تاج خانيم دئدي . و سونرا عنوانيني منه وئردي . اورايا گئتمه يي قرار وئرديم .
بئش يتيم آناسي اولان رحمتليك قمرتاج خانيم ، حيات يولداشيني فرقه محاربه سينده ايتيرميش دير . نصرت بيگ آدليم فرقه چي 21 آذر فاجعه سيندن سونرا تبريزين سويوق قيشيندا ، دار كوچه لرين بيرينده تانينماز بير نامرد الي له گولله لنيب و اولموشدو . قمرتاج خانيم ايسه بئش ائولادلا حيات چئتين ليك لريله تك باشينا قالميشدي . ياديما گله ن گونلرده من قمرتاج خانيمي محله خانيم لارينا ژاكت – اته ك – بلوز و... باشقا گئييم لر توخوياركن گورموشدوم . دئمه ك بو قرار ائو خرج – مخارجيني چيخارديرميش . آنجاق اونون ائوينه گئتمه ك و سوز آپارماق منيم ان گوزه ل ساعات لاريم اولوردو .
ائو ، آستانا دان توت تا تنبي اوطاغينين يوخاري باشينا كيمي سانكي بير ال ايشي موزه يي كيمي گورونوردو . قمرتاج خانمين الي له تيكيلميش پرده لر – طاقچا پوش لار – متككه اوزلري – بالش اوزلري – چيراغ اورتوك لري – جعبه اوست لري – نه بيليم ساماور يئري – جانماز – تيمم كيسه سي – دم پخت – يخدن اورتويو – رخت آويز اوستلويو .... و هر نه گوزه ل بير حال دا تيكيليب و گوز سئراسينا دوزولموش دور . اللرينده دايما ايكي ميل چابالاركن بيلميره م قمرتاج خانيم بونلاري تيكمه يه و دوغروسو ياراتماغا نه زامان باشارميش دير ؟ توپراق ليق حيه طي بير ائيله سولاييب و مرمري له سوپورردي سانكي حيه ط توپراق دان يوخ مرمردن توكولموش دير . هرنه قمرتاج خانيم ائوينده گول تك پاريلداييب و گول تك عطيرله نيردي !
گئچميش گونلرده نيم تاج خانيم ائوينه گئتديم . دوغروسو خاطره لر اوزوندن اونون ائويني عيني آناسي كيمي گوللو – عطيرلي و قادين الي له يارانميش تصور ائديريم . آمما تصورلريم سهو وارميش ! مخمل موكت لر – فرحي موبيل لر – ريزلي قالي لار – بوفت لر – اوپن مطبخ – سايي سيز لامپا شارلاري – مككه سوغه تي ميز اورتوك لري – سفارش اولان پرده لر – كركره لر ..... بو ائوين هر نه يي بازاردان آلينيب ائوه تاخيلميش دير ! .. اوره ييم سيغيلدي .. سانكي بو ائوين قاديني يوخموش !
دوغرودان زامان بيزلري نه ريه گئتيريب – يئتيرميش دير ؟ دوغرودان بيزيم قادين لارا نه گلميش دير ؟ اونلاردا اولان حيات سئوگي سي – ائو و عائله سئوگي سي ني كيم لر چالميش دير ؟ هر نه يي پول ايله آلماق و اوزه ل باشاري لاري هئچ ده قويماغي كيم بيزلره قئييدي ؟ بيزيم ذوق لي و صنعت كار قادين لاريميز ين الوان بوياقلي ساپ لارني كيم لر اللريندن آليب و اونلارين يئرينه الوان بوياقلي داوا – درمان لاري وئرميش دير ؟ دوغرودان هئچ بيليرسينيز قادين لاريميز آلتي بيرابر اركك لردن آرتيق حكيمه گئديب و درمان يئيرلر ؟

زهره وفايي