اردبيل كسين ليك له آذربايجان دير !
اردبيل كسين ليك له آذربايجان دير !
اوشاق لار { كيمليك } معناسيني سوزده آچا بيلمسه لرده، يقين كونول لرينده و دوشونجه لرينده همين كيمليك ايضاحيندا بير نئچه سوز – معنا و آچيقلاما بسله ييرلر . بو ادعاني اوز اوشاقليق دونيامدا اولان دوشونجه اوزوندن دئييره م .
آيه م ده– سايه م ده بير،ائويميزه دونه ن كربله علي دايي ، منيم ان ايسته ك لي گله ن لريمدن بيري سانيليردي.اوكيمسه نين دايي سي ويا خودبيزله نه ايليشگي سي وارايدي ، باشا دوشمزديم . آنجاق ديگر اوشاق لارلا برابر سئوينجك هارايلايا – هارايلايا « كربله علي دايي گليب دير ! » دئييب و قوناق حيه طينه جومارديق . اوزونده بيته ن بوغ – ساققال آدلي تير – تيكانا باخماياراق اوزوموزو اونون قــوجاقينا آتيب و ايسته ك له دولو گوروشمه سي ايچون شيرين بير ياريش گئچيرده رديك . داها سونرا كربله علي دايي ان بالا اوشاق لاري ديزي اوسته آليب و ديگر اوشاق لاري چئوره سينه ييغيب اونجه چئشيدلي جيب لريندن چئشيدلي يئمه ك لر چيخارديب ، هر بير اوشاغا بير اووج توتون له بلشميش ايده – بادام – كشميش – گيرده كان – عناب – بيچنديك ... نه لر و نه لر وئره ردي . سانكي اونون جيب لري توكنمز بير باققال آنباري دي ! و داها سونرا گزديك لري يئرلردن و گوردوك لري ماجرالاردان ، آنجاق اوشاق سئوه ن كيمي تعريف له ييب و سونرا سئرا اونون سيغار آليشديرماغينا گليردي . پاپيريز كاغيذين آغزيله ايسلاديب ، توتونو اوندا بورالاييب و آليشديراردي .آنجاق سيغار چكنده نه دئييب و نه دانيشاردي . ده رين بير فيكره جوموب ، گوزوندن اوزونه سئچرايان حسرت اوشاق لاري دا بئله سوسدوراردي . بير او قده ر اونو سئودييم ايچون ، اونو اوز دوشونجه لريمده بير عابيده كيمي يئر وئريرديم . آنجاق نه ده نين آراشديرمادان اونو سئومه يه بير عابيده كيمي تسليم اولموشدوم .
سنه لر سونرا كربله علي دايي و ديگر ايسته دييم و غيرتيني چكدييم معنالار آراسيندا بير ايليشگي دويدوم . بلكه هئچ ياراشمايان سوزدور آمما من اردبيله گئدنده اوزومو كربله علــي دايــي ديزي اوسته ايله شميش همين اوشاق حيس ائديره م .
مسكين ليك لر ايچينده بوغولان بئله هيكل لي و هيبت لي شهر ، هر بوجاغي چئشيدلي نعمت لرله قاينايان و داشان شهر ، سينه سي ناغيل لار – تاريخ لر و ماجرالارلا دولو اولان حال دا سوسگون شهر ، يئريندن اوزاق دوشه ن شهر ، الي خمير قارني آج – ائلين ديلين دانماغا باسيلان شهر ، كوچه ري قوشلار فضله سينه بله نن غيرت و همت له توكولموش بير هيكل، پاپيريزتوستوسونه دولاشان شهر ، ديزلرينده ياماق ، سينيق كوزه ده سو ايچه ن كوزه چي ، آنلي قيريش – قيريش ، اللري چاليشمادان آغاجا دونموش .... سوزون قيساسي : آيري – سئچگي ليك لر بندينه چكيلميش بير آسلان شهر !
ائل طايفاسيني ارمني لر قيران – مال دولتيني كوردلر چالان – كيمليگ يني پهلوي غارت ائده ن مين لر ديگر آذربايجانلي تك كربله علي دايي نين گئده ن ساعات لاري ان آجي ساعات لار ايدي . اونون گئتمه يي ايچون يوخ بلكه نه ساياق گئتمه يي ايچون. قوروچوره ك– كوهنه پار پالتار – يئيلمه ين دن دوش ....ييغيليب بير منده يه چئوريليردي . كربله علي دايي منده ني دالينا آتاركن باخيش لاريني اوشاق لاردان دا بئله گيزله دردي . دوغروسو هئچ ياراشمازدي . او كيشي يه بو ديلنجي ليك منده سي هئچ ياراشمازدي . آمما پاي بوله ن بئله بولموشدو .
اردبــيل ده خياوان كناريندا سايــي سيز آيين – اويون ساتيجــي لارينا باخاراق « گوز قاباغي بئله دير گور گيزلي ده نه لر چكير بو خالق » دئييب ، باخيش لاريمي اونلاردان گيزله ديره م .دوغروسو من هر زامان آذربايجاني گورمه ك ايسته يينده اردبيله گئديره م . كــربله علــي دايي نين قوجاغي بلكه همين ساوالانين اته يي ميش !
زهره وفايي – تبريز
اوشاق لار { كيمليك } معناسيني سوزده آچا بيلمسه لرده، يقين كونول لرينده و دوشونجه لرينده همين كيمليك ايضاحيندا بير نئچه سوز – معنا و آچيقلاما بسله ييرلر . بو ادعاني اوز اوشاقليق دونيامدا اولان دوشونجه اوزوندن دئييره م .
آيه م ده– سايه م ده بير،ائويميزه دونه ن كربله علي دايي ، منيم ان ايسته ك لي گله ن لريمدن بيري سانيليردي.اوكيمسه نين دايي سي ويا خودبيزله نه ايليشگي سي وارايدي ، باشا دوشمزديم . آنجاق ديگر اوشاق لارلا برابر سئوينجك هارايلايا – هارايلايا « كربله علي دايي گليب دير ! » دئييب و قوناق حيه طينه جومارديق . اوزونده بيته ن بوغ – ساققال آدلي تير – تيكانا باخماياراق اوزوموزو اونون قــوجاقينا آتيب و ايسته ك له دولو گوروشمه سي ايچون شيرين بير ياريش گئچيرده رديك . داها سونرا كربله علي دايي ان بالا اوشاق لاري ديزي اوسته آليب و ديگر اوشاق لاري چئوره سينه ييغيب اونجه چئشيدلي جيب لريندن چئشيدلي يئمه ك لر چيخارديب ، هر بير اوشاغا بير اووج توتون له بلشميش ايده – بادام – كشميش – گيرده كان – عناب – بيچنديك ... نه لر و نه لر وئره ردي . سانكي اونون جيب لري توكنمز بير باققال آنباري دي ! و داها سونرا گزديك لري يئرلردن و گوردوك لري ماجرالاردان ، آنجاق اوشاق سئوه ن كيمي تعريف له ييب و سونرا سئرا اونون سيغار آليشديرماغينا گليردي . پاپيريز كاغيذين آغزيله ايسلاديب ، توتونو اوندا بورالاييب و آليشديراردي .آنجاق سيغار چكنده نه دئييب و نه دانيشاردي . ده رين بير فيكره جوموب ، گوزوندن اوزونه سئچرايان حسرت اوشاق لاري دا بئله سوسدوراردي . بير او قده ر اونو سئودييم ايچون ، اونو اوز دوشونجه لريمده بير عابيده كيمي يئر وئريرديم . آنجاق نه ده نين آراشديرمادان اونو سئومه يه بير عابيده كيمي تسليم اولموشدوم .
سنه لر سونرا كربله علي دايي و ديگر ايسته دييم و غيرتيني چكدييم معنالار آراسيندا بير ايليشگي دويدوم . بلكه هئچ ياراشمايان سوزدور آمما من اردبيله گئدنده اوزومو كربله علــي دايــي ديزي اوسته ايله شميش همين اوشاق حيس ائديره م .
مسكين ليك لر ايچينده بوغولان بئله هيكل لي و هيبت لي شهر ، هر بوجاغي چئشيدلي نعمت لرله قاينايان و داشان شهر ، سينه سي ناغيل لار – تاريخ لر و ماجرالارلا دولو اولان حال دا سوسگون شهر ، يئريندن اوزاق دوشه ن شهر ، الي خمير قارني آج – ائلين ديلين دانماغا باسيلان شهر ، كوچه ري قوشلار فضله سينه بله نن غيرت و همت له توكولموش بير هيكل، پاپيريزتوستوسونه دولاشان شهر ، ديزلرينده ياماق ، سينيق كوزه ده سو ايچه ن كوزه چي ، آنلي قيريش – قيريش ، اللري چاليشمادان آغاجا دونموش .... سوزون قيساسي : آيري – سئچگي ليك لر بندينه چكيلميش بير آسلان شهر !
ائل طايفاسيني ارمني لر قيران – مال دولتيني كوردلر چالان – كيمليگ يني پهلوي غارت ائده ن مين لر ديگر آذربايجانلي تك كربله علي دايي نين گئده ن ساعات لاري ان آجي ساعات لار ايدي . اونون گئتمه يي ايچون يوخ بلكه نه ساياق گئتمه يي ايچون. قوروچوره ك– كوهنه پار پالتار – يئيلمه ين دن دوش ....ييغيليب بير منده يه چئوريليردي . كربله علي دايي منده ني دالينا آتاركن باخيش لاريني اوشاق لاردان دا بئله گيزله دردي . دوغروسو هئچ ياراشمازدي . او كيشي يه بو ديلنجي ليك منده سي هئچ ياراشمازدي . آمما پاي بوله ن بئله بولموشدو .
اردبــيل ده خياوان كناريندا سايــي سيز آيين – اويون ساتيجــي لارينا باخاراق « گوز قاباغي بئله دير گور گيزلي ده نه لر چكير بو خالق » دئييب ، باخيش لاريمي اونلاردان گيزله ديره م .دوغروسو من هر زامان آذربايجاني گورمه ك ايسته يينده اردبيله گئديره م . كــربله علــي دايي نين قوجاغي بلكه همين ساوالانين اته يي ميش !
زهره وفايي – تبريز
posted by zohre @ 11:35 AM
0 Comments:
Post a Comment
<< Home