آمريكا و شمالي سرحد لر

آمريكا و شما لي سرحد لر

يئني اوتوز ايل عرضينده يئر كوره سي بير نئجه غريبه و دئمك عقله سئغماز دونم لرله راست لاشدي . و چوخ غريبه ليق بو كي هربير دونم بير تهرله آذربايجان لا ايليشگي سي اولموشدور . بيرلشميش اس اس ارين داغيلماسي بونلاردان بيري اولاراق ، دونيا اوزونده بير دپرم كيمي سسلندي .آذربايجان ايسه بو دپرم مركزينه قونشو اولاراق تابي كي ان اونم لي و آغير دئيشيك ليك لر آلدي .
سنه لرجه آمريكا و شوروي حاكميت لري بير بيريله بوينوز بوينوزا چيرپيشاركن ، شوروي داغيلماسي بونا باخماياراق آمريكانين رولو اونون داغيلماسيندا نه قده ر اولوردو ، داغيتيم دان سونرا ان آرتيق پاي لاري و ثمرلري گوتورمه يه هئچ نه دن اسير گلمه ميش دير . او هر نه وار ايله اس اس اردن آيريلان اولكه لره بو يوروش ده اونجه مطلق اوز منافعني آختاراراق ، گله ن يوز ايل پروسه سيندن ده بلكه گوز اورتمه ميش دير . يئمه ك – اكين – فابريكا – آل وئر – پترول – يولچولوق – توريسم – كولتور – ايدمان.....هربير ساحه ده ائلچي لر گونده رن آمريكا حاكميتي ، دانيلماز بير صورت ده اساس پولتيك ايسته ك لرينين ايزلمه سي هئچ كيمدن گيزلي قالمادي . آنجاق بو ايسته ك لري آمريكا حاكميتينه بير عيب كيمي يوخ عكسينه بير چيخار كيمي ده يرلنديرمه ك اولور . دوغرو پولتيك بئله سانيلير . اونجه اوز منافعي ني تانيماق واونون يولونو تاپماق هر بير حاكميته چيخار حسابلانير . آنجاق بو ائلچي لر سئراسيندا آغير حدده حربي قوه لر وحربي دسته ك لر يئني قورولان اولكه لرده هانس منافعي ايزله يير ؟
اونجه ده قيد اولان دئيشيك لر بيريسي افغانستان دا اوز وئره ن حادثه لر و نهايت بو اولكه نين آمريكا ساريسيندان اشغال اولماغي دير . سويوق محاربه ياراتميش دوشمان چيليق اوزوندن ، قونشو بير اولكه ني اشغال ائتمه ك ، ديگر اولكه نين چيخاريني عيارلاماق كيمي سانيلير . ائيله سه افغانستان آمريكا اولكه سيندن اولان مين لر كيلومتير فاصله ايله ، نه دن آمريكانين ديققتيني چكميش دير ؟عراق اولكه سي اشغالي يئنه ده عصرين غريبه حادثه لريندن سانيلير . و چوخ غريبه بو كي يئنه آمريكا بو ايش ده اونجول دور . هرحالدا بو حادثه لري عيارلاياراق ، آذربايجان بئله دئيشيك ليك لر و پولتيك اويون لار آراسيندا نه دوروم دادير ، اونملي بير مبحث اولاراق ، تاسف له چوخ آز اونون حاققيندا سوزلر گئتميش دير .
اوتوز ايل بوندان اونجه يه كيمي دونيا، پولتيك اوزوندن ايكي باش قوه آراسيندا بولونه رك ( آمريكا – شوروي ) هر ايكي قوه ديگرين ضعيفلتمه ك ايچون هرنه باشاري لارين ائتميش لر . شوروي گيزلي جه حربي آلت لر دوزلده رك ، آمريكا شانتاژو يالانچي هاي كوي لرله كولتوره ل حال دا دونيانين هر بير يئرينه آياق آچميش دير . ان آزي قوردوغو كوكا كولا ايچگي سي له ، دونيا خالقيندا اوزوندن بير دينج تصور ياراتميش دير و ديگر طرف دن بو اولكه يئني بير اولكه اولاراق دونيانين هر بير اولكه سيندن كوچه ري لري آغير حدده قبول ائده رك همين كوچه ري لر عايله سي ساريسيندان اوزونه بير آياق يئري آچميش دير . حالبوكي شوروي باغلي سرحدلر اساسيندا اوزوندن بير سيررلي – گيزلي – عيني حال دا دهشتلي بير تصور ياراتميش دير .
آذربايجان بو ايكي دوشمان آراسيندا دايانان سرحد اولاراق تابي كي هر ايكي حاكميت ساريسيندان اولدوقجا آغير ضربه لره معروض قالميشدير . شوروي حاكميتي « بو اولكه آمريكايا يانيلماسين » دئيه ، ارمني لري بير توخماق آغاجي كيمي قونشولوق دا وداها ايره لي ، اولكه نين ايچينده يئر وئريب ، باشارديغي قده ر بئجرتميش دير . آمريكا ايسه « بو اولكه شوروي يه اينانماسين » دئيه ، فارس شوونيزمين اونا قارشي اولدوقجا دسته ك له ييب و يوگورتموش دور . آنجاق آذربايجان خالقي بو آرادا كيم اولدوغون و نه اولدوغون گيزلتمه يه مجبور قالميش دير . بير مقراضين ايكي ديشي آراسيندا چارپيلان آذربايجان ، اوچونجو پولتيك حيله لريندن ده كنار قالماميشدي . آوروپا بيرليي ، اس اس ار داغيلاندان سونرا « دونيا بير تك باش قوه الينه دوشمه سين » دئيه ، آمريكا برابرينده آوروپا بيرلييني گوجلنديرمه يه چاليشميش دير . آمما بو بيرليك ده اولان حاكميت لرسنه لرجه دينج ياشايشدان سونرا ، پولتيك دن ، خصوص اولكه دن اوزاق يئرلرده ، مطلق خبرسيز اولاراق دئمه ك اونلارين اورتا آسيا پولتيك لري انگليز حاكميتينه دوشموش دور !عصيرلر بويو آپارديغي پولتيك اوزوندن ، انگليزلي لر داها ياخشي بيليرلر بير تاپدالانميش اولكه ني و خالقي ايشه توتماق و فايدالانماق دا هانسي يول داها سهل و ياخين دير . اونلار اوچونجو توخماقي بسله يرك ، بير آن دا يوزلر منافعي ايزله ميش لر . كورد باشچي لارينا مستقل چيليك و توپراق وعده سي وئره ن انگليز ، تابي كي بو پاي لاري اوز دده سي ماليندان يوخ بلكه يئنه آذربايجاندان وعد ائتميشدير ! بو ساحه ده آوروپا بيرليي « توركيه حاكميتي بلكه آذربايجانا سمپات ليق گوسترسين » دئيه ،بو اولكه ني ده كوردلر – ارمني لر و يونان لي لار ساريسيندان مقراض لاميشدير .
ژئوپولتيك باخيميندان دونيا آچاري ساييلان آذربايجان ، ده يرلي وارليق لاريندان علاوه ، غيرت لي خالقي واردير و بو هئچ بير قارشي قوه يه خوش گلمير . اونا گوره خالقي غيرت دن سالماق و بير تهرله اونو « خنثي » ائتمه يه و نهايت اولكه سيندن ال اوزمه يه مجبور ائتمه ك ، بو پروسه نين سونو اولا بيلير . بو گون آمريكا حاكميتي ايران حاكميتيه توتدوغو ژست و بو اولكه يه ديگر قونشو اولكه لر كيمي يورومه ك و اشغال ائتمه ك سوزو ، هر بير خبر مركزينين اونونده گئده رك ، يئنه آذربايجان و آذربايجانلي لار بو پروبلمه اونجول اولاراق ، دايانميش لار .شمالي سرحدلرده و اونا ياخين يئرلرده حربي قوه لر توپلانماسي و شانتاژ اولاراق « بلكه آمريكا شمالي سرحدلردن اولكه يه يورومه ك ايسته يير » سوزو ، چوخ آجي سوز اولا بيلير . زور – گوج ايله كرپيجي – كرپيج اوسته قويان آذربايجان شهر و كند لري تانيماديغي حربي قوه لر آياغي آلتيندا قالماسي ، اونلارا آجي بير خاطره ني ، عثمانلي لار و روس لار يوروشوندن – ارمني لر – كوردلر – جيلولار – آسوري لر – گورجولر ...ائتديي قرقين لاريندان ، عراق و ايران محاربه سيندن خاطيرلادير . دايما حرب لرده آياق آلتيندا قالان و ان آغير ضربه لري گوره ن آذربايجان ، بو دونه بو ساياق حرب لردن قورتولا بيلرمي ؟
ايران اولكه سينه باش اولان آذربايجان آياق دا دورماق لا اولكه ني ياشادا بيلير . بو سوزو حاكميت اون ده توتاراق عيني حالدا كي آذربايجان خالقيني داها صميمي و داها دوزگون باشا دوشور ، آذربايجان رسپوبليكاسي له ده بير دوزگون و ثمرلي پولتيك اوزوندن ايش بيرليينه گئچمه لي گورونور . مركز ده ايله شن و ايللرجه پهلوي شونيزيمين درسيني آلان بير كوهنه پولتيك آدامي ، دورومو نه تك باشا دوشمز بلكه عكس دوشونه رك تام ترسينه يوللار گوستريب و دوشمانا ايپ اوجو وئره بيلير . بير گون « آذربايجانلي كمونيست اولا بيرلر » دئيه ن لر و اونو بو ظن ايله تاپدالايان لار بوگون ايسه « آذربايجانلي پان توركيست اولا بيلير » دئييب و يئنه اوز سهولرينده اصرارلي ديلار . مردي قوغا – قوغا نامرد ائده ن پولتيك چي لر ، بلكه دورومون نه قده ر جدي و نه قده ر تهلكه لي اولماغين ياخشي جا آناليز ائتميرلر . عثمانلي امپراطورلوغون پارچالايان استعمارچي لار بو گون داها باشاريله و داها حضورلو ، اورتا آسياني پارچالاماغا چاليشيرلار . عراق و افغانستان اشغاليندا گوروروك نه تك روسيا و آوروپا بيرليي و ديگر اولكه لر بلكه بين الخالق مركزلرده باشاريسيز اولدولار . بونون نه دني عراق و افغان خالقينين اينامسيزليغي و هرزامان حاكميت ساريسيندان تحقير اولوجو حال دا قوغولماق لاريدي . يوخسا خالقي فيكيرلرده و اراده لرده اشتراك وئره ن حاكميت لر ، دايما اوز خالقينا گوونه رك ديشه ري دن گله ن هر بير قره قورخونو راحات جا رد ائديب و دونيايا بئله حاق اولدوق لاريني بيلديريب لر . حاكميت لر بلكه دئيشيلير آمما بير اولكه نين خالقي هئچ بير زامان دئيشيلمير . آنلاشما ، حرب دن اوستون و دوغرو اولاراق ، فرصت لر فايدالانمالي دير .

زهره وفايي