میللی حرکت 1383 نجی ایلینده

میللی حرکت 1383 نجی ایلده

ایللر بوندان اونجه دن زامان طلب لری اوزوندن یارانمیش آذربایجانین میللی حرکتی دیگر بیر ایلی باشدان سووب و البته کی چئشیدلی تجربه لر و اوغورلار قازاناراق یئنی بیر ایله آیاق باسیر . بو حرکت جانلی و گورکملی بیر حرکت اولاراق ؛ گئچمیش بیر ایل عرضینده چوخلو آذربایجانلی لاری اوزیله یولداش ائده رک ؛ چوخلو دا یئنی طلب لر و پروسه لر یاراتمیش دیر . داها یاخشی سی میللی حرکت دورومونو ؛ گئچمیش ایلده بیر یاشیل بوغدا زمی سی کیمی تصور ائده ک . بو زمی داها تر – تله سیک سپله نن دنه لر ؛ واختلی – واخت سیز وئریله ن سولار ؛ زامانی چاتمادان بیچیله ن حاصیل اوزوندن یوخ ؛ بلکه داها دقت لی و داها دوغرو بیر زمی کیمی بسلنمیش . دنه لر سپیلمه دن اونجه یئر هامارلانیب ؛ داشی – چانقیری آیریلیب ؛ و اونا گوره ده بو زمی ده بیته ن بوغدالار بیر سویه ده و بیر بوی دا گورونور . دوغرودور ! میللی حرکت ؛ ده رین اسلوب لار قراریندا « عمودی» حال دا یوخ « افقی » حال دا گئنیش له نیب و بویوموشدور . مین لر بلکه میلیون لار آذربایجانلی بو حرکته بیر میلیت چی و آذربایجانچی کیمی قوشولماق لاری همین گئنیش لیک اوزوندن دیر . بو گون هر بیر شهرده و کندده بئله ؛ میلیت چی لیک مفکوره سینی خالق ایچینده آیدین جا گورمه ک اولور . بو مفکوره آشیری ناسیونالیسم اساس لاریندا یوخ ؛ عکسینه اوز کیملیک لرینی دوغرو دوشونمک اساسیندا یارانمیش دیر . اوز کولتورونه – تاریخینه – مدنیتینه – اقتصادیاتینا – و گله جه یینه مئیل گوستره ن آذربایجانلی لارین سایی گونو گوندن آرتماق دادیر . همین ماراق ؛ بیر ده رین بیرلییه امکان وئرمیشدی . دیگر طرف دن بو ماراق و بیر لیی نه سایاق گوسترمه ک سویه سی ها بئله ؛ دوغرو اکیله ن زمی نین دوغرو ثمری کیمی اولموشدو .
اون لار ده رگی گئچمیش ایلده یئنی دوغولموش لار . تکرار یاییلان ده رگی لرین سایی بللی دئییل . یوزلر کیتاب – جزوه – نوت – ال به ال یایلمیشدیر . مین لر مقاله چئشیدلی قونولاردا یازیلیب و یایلمیش دیر . ضییق لره باخمایاراق ؛ یوزلر جمعیت ؛ توتاق شعر و ادبیات ایچون ؛ توتاق داغچی لیق ایچون ؛ و دیگر سئرالاردا یارانمیشدیر . یوزلر توپلانتی هر بیر شهرده و هر بیر نوقطه ده قورولموشدو . چئشیدلی مراسیم لر آپاریلمیش دیر . اون لار یئنی اینترنت سایت لاری – وبلاگ لار ... قورولموشدور . میلیون لار آذربایجانلی بیر تهر له بیر – بیریله ایلیشگی یارادیب ؛ دانیشیق لار آپارمیش لار . دوغروسو بوگون بو یاشیل زمی نین بوتالاری ؛ بئله اسه ن یئل دن ده سوزلرینی بیر بیرینه چاتدرماغا فایدالانیرلار !
ستارخان توره نی – 24 آوریل – صفر خان مراسیمی – خارابا کلیسا – بابک قالاسی – پوزوق دئییرمان مراسیمی – سرچشمه مسجیدی – شبستر توره نی – 21 آذر مراسیمی – مشروطه ایل دونومو – طغرل توره نی – آنا دیل گونو – قادین گونو – اویرنجی لر توپلومو – عین الی مراسیمی – آخیر چرشنبه مراسیمی _ اونلار عزیزلمه مراسیمی – اون لار موسیقی اجراسی – باشاریلی تیاتر لار – سئرگی لر.... و یوزلر دیگر بئله جانلی حرکت لر ؛ گئچمیش ایلده میللی حرکتین گوستری جی سی اولموشلار . سیاسی محبوس لار کمیته سی – مدافعه کمیته سی ( وکلای داوطلب در حمایت از فعالان ) – جمعیت توسعه آذربایجان .... وداها اونملی اوچ مالی یاردیم لار صاندیغی قورولماسی میللی حرکت ده بیر آتدیم حساب لانیرلار .
میللی حرکت هر بیر حرکت چی نی چرچیوه سینه آلدیغی حال دا ؛ آذربایجان دان کنار یاشایان آذربایجانلی لاری و خصوص اولکه دن اوزاق یاشایان آذربایجانلی لاری همین گئنیش لیک سویه سینده ایره لی گئتمه یه راضی ائتمیشدیر . گئچمیش ایلده خارج ده یاشایان حرکت چی لر داها دوغروسو آشیری و عقله سیغیشمایان ایش لر و سوزلردن اولدوق قده ر اوزاق گزمیش لر و عکسینه دوغرو و ثمرلی ایش لره قول قویموش لار . بیر نئچه خبر ارگانی قورماق دا – نئچه اینترنت سایتی یاراتماق دا – نئچه جمعیت قورماق دا و ایجری ده اولان حرکت چی لرله ایش بیرلیک یاراتماق دا هر بیر ایل دن ده یرلی اولموش لار .
آنجاق تاسف له هر بیر زمی ده اوت – آلاخ ؛ قورت – قوش ؛ اولار ؛ اینانیریق ! میللی حرکت نورمال اولاراق و چوخ یقین کی قصد اوزوندن ؛ چوخلو بو اوت – آلاخ لارا و قورت – قوش لارا توش دور ! « عمل » ده هئچ آمما « ادعا » ده یوز گله ن بئله کس لر ؛ زمی نین بو یاشیندان قوغولدوق لاری حال دا او باش دا « آفت » تورتمه یه جان آتیرلار . اونلار آتالار دئمیشکن [ قاریشقانین یوواسینا دامجی دوشنده هارای لار سئل گلدی قاچین ! ] هر نه یی اوز چیخارلاری قده ر عیارلاییرلار . بیر گون قهوه ده سوزلری بیریله ترس گلنده « هارای ! داد وبیداد ! حرکت دچار شکاف شده است ! » باغیریرلار ! ایکی گون « آری یوواسی » اولان « ایش یئرلرینه » خوره ک تاپمایاندا « هارای ! داد وبیداد ! حرکت دچار رکود شده است ! » باغیریرلار ! ....« بورون لارینین اوجوندان اوزاق یئری گوره بیلمه ین » بو کس لر دوغروسو بیر ائیله منم – منم دئییب لر کی آز قالسین اوزلری ده یاهالیب لار کی بیر کس دیلر !!!
آمما بونلار باخمایاراق میللی حرکت دوغرو بیر یول دا ؛ دوغرو آماج لار لا ؛ و اساس « آذربایجانین خئیرینه » ساری مقصدلرده ؛ میلیون لار حرکت چی واسطه سی له ایره لی گئتمه ک ده دیر . تامام انسان لاری سئوه ن آذربایجانلی و تامام انسان لارا آزاد یاشام حاققینا حورمت له یاناشان آذربایجانلی ؛ بو گون اوچ سوزه اینانیر : ده رین دوشونمه ک – دوغرو حرکت ائتمه ک – و دوزگون سونونج آلماق ! بو باره ده اونلارا« یار» اولانماساق دا باری« بار» اولمایاق !

زهره وفایی – تبریز
Zohre-az@yahoo.com