زهره وفايي آراز ده رگي سي له آپارديغي دانيشيق

زهره وفايي آراز ده رگي سي له آپارديغي دانيشيق ( تاريخ 17/10/1383)

مدني ايشلر اوجاغدا ايشلنمه لي ديلر

زهره وفايي خانيم آذربايجان تورك ادبياتي ساحه سينده چاليشديغيز ايچون ايلك سورونو بو ساحه يه وئريريك . سيزجه آذربايجان ادبياتي اينديكي چاغدا نه دوروما ماليك دير ؟
n بونا جاواب اونجه بيلمه لييك هانسي چاغي و هانسي يئري قياس ائديريك . منجه آذربايجان ادبياتي گئچميش اوتوز ايل قياسيندا بو گون ياخشي دوروما ماليك دير . آمما اوتاي آذربايجان و ها بئله باشقا اولكه لرله قياس دا دئمه ك چوخ گئري قالميشيق .
ايران چرچيوه سينده اولان فابريكا ماليك لري چوخو آذربايجانلي ديلار .سيزجه آذربايجان سرمايادارلاري بو گئديش ده نه رول لاري اولا بيلير ؟
n ايلك اولاراق بيزيم توقعي ميز ارشاد اداره سيندن دير كي بو ايشه متولي سانيلير . اوندان اومودوموز كسيله ن حالدا البته بئله سرمايادارلار دالي جا گئتمه لييك . بئله دوشونورم كي سرمايادارلار ايله دانيشماغين اوزه ل يوللاري واردير . اونلاري راضي ائتمه ك دانيشيق ايسته يير . بئله كي اونلار مالي فايدالاردان گوز يوموب و بو ايش لرين داشيديغي كولتوره ل منافعي يه اينانسينلار . منجه كولتوره ل ايش لر بير پس انداز كيمي دير . بير ملتين اعتباري اونون كولتورونده دير .
اينديليكده توركجه ديلينده اوزه لليكله آوروپا اولكه لرينده چوخلو كيتاب و ده رگي لر نشر اولور . بونلارين آذربايجان مدني حركتي انكيشافيندا خصوص ديل و ادبيات ساحه سينده نه تاثيري اولا بيلير ؟
n البته كي ائتگي سيز دئييل . ياييلان كيتاب يقين بير يئرده ثبت اولور . كولتور دئييلنده عموم كوتله نين ايسته يي – فيكري و هايئله اينامي دير . من بيلميره م ديشه ري ده چاليشان لار نه ساياق چاليشيرلار . بلكه ايچري ده اولان قايناقلاردان فايدالانيرلار . و يا گئچميش ده ثبت اولونان اثرلردن ياراناليرلار . هرحال دا ايشلري ده يرلي دير . منجه مدني ايش لر اوجاغين اوزونده ايشلنمه لي دير . اوجاقدان اوزاقلاشديقجا ايستي سي ده آزالير توستوسو ده ! بيز گره ك ايچريده چاليشان لارا آرتيق يارديم ائده ك . ايشلريني داها دقيق و داها دوزگون يارتماغا اونلارا امكان ياراداق . بئله ليك له بير اثر ثبت اولونان حال دا اونا مراجعت ائدنلر بيلسين لر كي بو اثر ميز داليندا يارانماييب دير بلكه اونو يارادان قاپي قاپي گزيب دولانيب دير . بيز اينديليك ده ديلچيليك و ها بئله سوزلوك حاققيندا آغير چاتمامازليغيميز واردير . بو ايش بير كسين ايشي دئييل نه دن كي بير كس تكجه بير كس قده ري چاليشا بيلر . بو گون آذربايجان دا بير لوغت شناسليق مركزي گره كير .
بويوردوز اوجاق دا ايشلنمه لي دير ايش لر و سيزجه بو اثرلر ايچريده ياييلسا داها ياخشي اولماز ؟
--- من بيلميره م اونلاري يايان لار نه آماج داديلار . بو گون اينترنت بير نهنگ واسطه دير . ايش اهلي هر نه يول ايله اولموش سادا آختاريب تاپاجاق دير . بورادا بيرده ساتيش پروبلمي واردير . و ديگر طرف دن سوز صاحبينه يئتيشمك سوزودور . منجه اساس ايشين بوراسي دير . اوجاق دا دوروم بير ساياق دير كي يازيچيا يازي دان چوخ اعتبار وئريلير . ايش ده گوروروك كي تانينميش يازيچيلارين اثرلرينه آرتيق ماراق گوستريلير . آمما آد بير آز نابلد اولاندا اوخويان شبهه ايله ياناشير . منجه اساس اوخوجونو جذب ائتمه ك دير . و من ايشلريمده بو باره ده نائليت تاپميشام . خالق سئوير اوز فولكلورونو ثبت اولموش حال دا گورسون . دوغروسو بيزلر هر گون و هر ساعات اوز فولكلوروموز ايله ياشاييريق آمما يازيلان حال دا خالق اوز شكليني دوغرو بو كيتاب دا گورور . بونلار حاقلي ديلار ايه ر ايسته ييرلر اوز حاقلاريندا آرتيق معلومات آلسينلار . اوز تاريخ لري حاقدا آرتيق بيلسينلر . بوگون هر كيمسه دونيانين هر هاراسيندا يازير گره ك كي اونجه اوز مخاطب يني تاپسين . و ديگر طرف دن اوجاق دا ياشايان بيري خالقين گوجوندن خبرداردير . اونا گوره چاليشيريق قيمتي اوجوز كيتاب ياياق . بونا بلد اولمايان لار كيتابي يوخاري قيمتده بازارا وئريرلر و يا قونو نامانوس اولور . و بئله حال دا خالق ياخشي قارشيلامير و يالنيش ايش گوره ن لر بونسوز كي اوز يالنيش ليق لارين قبول ائتسين لر گوناهي خالقين بوينونا ساليرلار كي جاماعات عوام دير بيلمير كيتاب نه دير . كيتاب اوخوماق نه دير . كيتاب يا ده رگي ايشي بير اينجه صنعت دير و بيري بو ايش ده باشاريلي اولماق ايسته سه هر طرفلي حسابلاييب سونرا مئيدانا گيرمه لي دير . يوخسا شهرت يا باشقا آماجا گوره اولسا هر توره لي سونونجا قاتلاشمالي دير .
ايندي مخاطب لريميزين باشلاري آشاغا يئنيب دير . نظره گلير داهادا آشاغي آپارمالييق . اورنك ايچون بينوره لي بير ايش گورمك ايچون اوشاق ادبياتي ساحه سينده چاليشمالييق . بيزيم اولكه ميزده بو باره ده نه ايشلر گورولوب سيز لر نه ايش گورموسوز ؟
--- دونيانين چوخ يئرلرينده ايش بئله دير كي مثال شطرنج ايچون كلوپ لار وار – كلوپون ده رگي سي وار – كيتابي و يازاني وار . اثرلر بير تشكيلات اوزوندن يارانير . آمما بيزلر تامام اوزه ل گوج لريميزله چاليشيريق . اونا گوره ده ايش ده يرلي اولمور . اوشاق ادبياتي دا بو سئرادان دير . من اوچ – دورد ايل اولور بونا چاتميشام كي اوشاقلاريميزي دا كولتوروموزده اشتراك وئرمه لييك . اوشاق ادبياتيندا بير نئچه كيتاب يايميشام . البته ده رگي مجوزي ايسته ميشم اولماييب . اوشاغي آرتيق دوشونه ن آناسي دير . منجه خانيم لار و آنا لاريميزا بو باره ده آرتيق وظيفه دوشور تا ائولادلاريله علاقه ساخلاسين لار . اوشاقلارا اويرتمه لييك كي توركو اونلارين اصيل ديلي دير . بو ديلده كيتاب دا اولا بيلر – بير تكميل ديل كيمي ناغيل – نقاشي – و هر بير زاد اولا بيلر . اوشاقليقدان بو ساياق عادت ائتسه لر چوخ ياخشي اولار . بو ايشلر البته متولي ايستير و اودا كي قحط الرجال دير ! هر حال دا هر كيمسه نه قده ر اليندن گلسه بو باره ده چاليشسا غنيمت دير .
دئدييز كيمي اوشاقلارين اوستونده ايشله مك چوخ قادين لارين وظيفه سي دير . آمما گوروروك كي بعضي خانيملار اوشاقلارين فارسي اويره ديرلر . بونلار بئله دوشونورلر كي فارسي باجاران اوشاق ياخشي درس اوخوياجاق بير حالداكي روانشناس لار بونون ترسين دئييرلر اوز آنا ديلين ياخشي باجارمايان اوشاق اوزگه ديلينده ياخشي اويرنه بيلمير بو زمينه ده فرهنگي ايشلر گورمه لييك . نه جور ائده بيلريك كي خانيم لارا يئتيره بيله ك كي اوشاقلاريميزا اوز آنا ديللرين اويرتمه لييك ؟
--- اونجه ده دئدييم كيمي بيز هانسي قياس اوزوندن بونو دئمه لييك . بو گون اوشاقلارا توركو آد قويماق داها شدت له يرينه گئدير . يوزده سكسان فاييز اوشاقلارين آدي توركودور . بو بير آتا و آنانين اوره ك ايسته يين يئتيرير . و گوسترير كي بونلار بونو دوشونوبلر اوز كولتورلرينده گوزل آدلار وار و باشقا ديللردن آد بورج آلماغا احتياج گورونمور . ديگر طرفدن عائله لر اوشاقلاريني فارسي دانيشديرديقلارينا گوره گركمز اونلاري چوخ قئناياق . گورورسوز كي اوشاغي فارسي يا توركو دانيشديرماق ائوده بير ائيله اونون ياراماغيندا تاثيري اولمور . آمارلار گوسترير كي ايكي ديللي اولكه لرده اوشاقلارين درس دن دوشمه سايي سي چوخ يوخاري دير . بونا مسئول لار گره ك فيكير وئرسين لر . بلكه بو ده يرلي سرمايالار اليميزدن گئتمه سين . گره ك كي اوشاق دا و آنا دا بير قرار علاقه يارانا . يوخسا زور هئچ زامان دوز گون جاواب وئرمه ييب . اونجه ده هر بير كس اوزو اينانمالي دير كي گوبله ك دئييل كي يئردن چيخميش اولسون . اينانسين كي اوزونون بير ده رين كولتورو واردير . بونا اينانسا اوزو يارادان لاردان اولاجاق دير . همين اوشاق كي ائوده فارسجا دانيشديريب لار اون دورد ياشينا چاتاندا بيزه مراجعت ائدير و توركو اوخويوب يارماغا يارديم كيتاب لار ايسته يير . اوشاقلار بير زامان بويويوب و گرچك لري باشا دوشه جك لر . آمما بيز ايله شيب بو زاماني گوزله مه مليك . اوشاقلاريميز گاهي شاشقين قاليرلار كي بو گئيدييم پالتار – بو دانيشديغيم ديل – بو منيم آديم – كيميندير . بير گورو كيمي بو سورو لارا هر تهر له جاواب وئرمه ك هر بير كيمسه نين بوينوندا بير وظيفه كيمي دير . ساده جه اوشاغا بير توركو آد سئچمه ك له اونا آنديراق كي سن هويت سيز دئييلسن – و سنين كيمليين چوخ گونمه لي بير كيمليك دير . و بونا گوره نه تك هئچ اوتانماغا يئر يوخدور بلكه عكسينه چوخ فخر ايله دئيه بيلسين من كيمم – نه سيه م – هر حالدا من بونا اينانيرام كي خانم لار بو باره ده آرتيق اثرلري اولا بيلر .
سيزين يازي لارين چوخو فولكلور باره سينده اولوب دور . ايندي نه ايش واريدي ؟ نه ساحه ده چاليشيرسيز – الينيزده نه ايش وار ؟
--- اوتوز عنوانا ياخين فولكلور كيتابيم يايليبدير . آنجاق بو ايش بير ائله گئنيش دير كي بير كس ين اليندن گله ن دئييل . و نه ده عومور بونا كفايت ائده ر . من كيتاب لاريمين اون سوزونده يازارام كي بو عنعنه ميثال تبريزين ششگلان محله سينه عايددير . دئمه ك حدديني بللي ائديره م . چاليشيرام آز تيراژ دا اولسادا ييغديق لاريمي ياييب و ثبت ائده م . بير پاراسينين عنوان لاري بير ائيله تئزه دير كي حتي او تاي دا چاليشانلاردا گورمه ميشه م . ميثال آلقيش – قارقيش توپلانتي سي يا گئييم لر و يا قاب لار . يا اولچولر حاققيندا مختص بير كيتاب يازلماييب . باشقا شهرلرده اولان اويرنجي لر ده بو باره ده ياخشي چاليشيرلار . اونلار بونو يقين ائديب لر كي بو فولكلور بيزيم دير و بيز لر اونو توپلامالييق . ايندي ليك ده نام آورا آذربايجان « 5 » - و « اوروج » قيسا ناغيللاريمين مجموعه سي و بيرده « مزدك » آدلي كيتابيم چاپدادير . « اوشاق مكتبي – 3 » ده ها بئله چاليشيرام .
ادبياتيميزين گله جه يين نه جور گورورسوز – سيزجه بو گئديشاتينان گله جك ايشيق دير يوخسا قارانليق ؟
--- دوغروسون ايسته سز اولمه ديريل بير ايش دير . اوساياق كي دونيا سويه لي ايره لي گئدير بيز گئتميريك . بيز اوز ايچيميزده ده علاقه ميز آزدير . ها بئله بين الخالق مركز لرله علاقه ساخلامالييق . تا دونيا بيلسين كي بورادا چاليشان لار واردير . بورادا بير زنگين كولتور واردير . گله جه يه گوره دئمه ليه م بيز سيز ده بو كولتور ياشاييب و ياشاياجاق دير . بو گون دوروم لار فرقلي دير . بو گون يونسكو كيمي مركز كولتورلرين محو اولماسيندان خبردار ائدير . بو گون بير پارا شانتاژلار واسطه سي له بير پارا كولتورلر – مدنيت لر آرادان گئتمه ده دير . شوكور تانريا – بيزيم كولتوروموز چوخ كوتوكلو دور بو تئزليك ده آرادان گئده ن دئييل . آمما بونو دا دانماياق كي بيزيم كولتوروموزه ده چوخلو نفوذ لار اولوب دور . اونو قوروماغا عموم حال دا بير يول تاپمالييق . تكجه بير كسين سوزو اينانميرام بير ائيله كسرلي اولسون . بو بير ميللي مسئله دير و ميللي بير اراده ايله قاباغينا چيخمالييق .
بويوردوز عموم يوللاري تاپمالييق . بو يوللاري كيم تاپاجاق دير ؟
--- او كس لر كي بو خطري حس ائديرلر . آتالار دئميشكن په ايله پلو اولماز ياغ ايله دويو گره گ – بوش ال ايله نه قده ر دوشونسن ده – نه قده ر يول بيلسه ن ده – نهايت بير ژورناليستي مقاله حديندن آرتماياجاق دير .
ادبيات ساحه سينده – اوز اولكه ميز و ها بئله شهريميز حاققيندا نه بويورورسونوز ؟
--- من سرحد بو آرادا گورموره م . من ايسته ينده آذربايجاني ياخشي حس ائده م اردبيله گئده رم . نه دن كي اردبيل آذربايجانين ديگر شهرلرينه نسبت آرتيق آذربايجان قاليب دير . دوغروسو اوجاق دئدييميز گونئي ده ائيله بيلرسن دورت ستونو لاخلاييب . اودور كي من هئچ بير يئري باشقا تهر دئميره م . آذربايجان كولتورون دئيينده من شيراز دا ياشايان تورك لر – قاشقايي تورك لر ..... نظرده آليرام . او زامانا كيمي كي بو ايشه بير متولي يوخدور اوزوموز بير متولي كيمي چاليشمالييق . اليميزدن گله ن ايشه يوخ دئمه يك . فيكيرداشليغيميزي – بيرلييميزي داها آرتيراق . هرنه قده ر منيمسه لييميزي آزالدساق بير ائيله ثمر گوتوره جه ييك . مدني چاليشماق لار فيكير بيرليك ايسته يير . بو ايش بير اوزه ل ايسته ك دئييل كي هركيمسه اوزونه بير مود آييرا . هامو بير – بيرينه باغلي اولمالي دير . بونسوز كي بيري بو يول دا اوزونه آرتيق حاق آييرا . هاموميز بير ملتيك و بير دام آلتيتدا ياشاييريق .
نظريز آذربايجان دا چيخان ده رگي لرين حاققيندا نه دير – اوزه لليك له آراز باره سينده – بير سوزونوز – راهكاريز وارسا بويورون .
--- من بير زامان ده ر گي ايشينده اولدوغوما گوره ايشين چم – خمين بيليره م . اوزاق دان باخان بئله بيلر كي بوياق خانا كوپودور – ده ر گي لري باسيب چيخاريرلار و دوزورلر گون قاباغينا ! چوخ – چوخ زحمتلي ايش دير . اونا گوره ده من ده ر گي لرده چاليشان دوست لاريميزدان اصلا آرتيق توقعي ائتمه ره م . چون امكان لاريندان و محدوديت لريندن خبريم وار . اونا گوره ده دئييره م اللريز آغريماسين . آراز اردبيلده و ها بئله تبريزده چوخلو سمپات لاري واردير . بير ده رگي اوزونو بيطرف ساخلاسا چوخ بويوك ايش گوروب دور . آرازين باشاريسي اونون گرچك لره آرتيق توخونماسي هابئله بير پارا مسئله لردن اوزونو كنار ساخلاماسي دير . انشاالله ايللر بويو آياق اوسته دايانسين . يوخسا آل – وئره چكيلسه چوخ امكاني واردير كي حاييف اولسون . حاييف اولماق لا حرام اولماغين فرقي وار . نئجه كي بير انسانين ياشاميندا اساس نه ساياق ياشاماق دير نه چوخ ياشاماق و داوام . ده ر گي لرده ده دئيلمه سين كي آتميش نومره ياييلدي – يئتميش نومره ياييلدي . دورد نومره ياييلسين آمما ده ر گي ياييلسين نه باشقا بير شئي !شوكورلر كي آراز بوگونه دك باشارا بيليب دير دوز يولدا اوزونو آياق اوسته ساخلاسين .
بيزده سيزه اللريز آغريماسين دئييريك كي بو چتين ليك له بو دورومدا اينديه كيمي اليزدن گله ني اسير گلمه ميبسيز . اليزدن هر نه گليب ادبياتيميز – فولكلوروموز – كولتوروموز ها بئله ديليميز حاققيندا گوجوز چاتان قده ر چاليشيب سينيز . دئمه ك اولار سيز آذربايجانيميزدا او كس لردن سينيز كي هميشه و هر وضعيت ده دايانمادان چاليشيب سيز . بونا گوره اوزوم و همكارلاريم طرفيندن سيزدن تشكر ائديب اللريز آغريماسين دئييره م .
--- ساغ قالين – الله سيزي ده يورماسين . ايه ر تصديق ائديرسيز كي دايما صحنه ده اولماق بير امتياز دير سيزده بو امتيازي اوزونوزه ساخلايين و هر دوروم دا صحنه ني باشقا يادلارا وئرمه يين و اوزونوز مئيداندا اولون . ساغ قالين !