حركت ده تسويه يوخسا تصفيه؟

حركت ده تسويه يوخسا تصفيه ؟
( elimination)

هر بير قورولوش دورت بللي چرچيوه ايچينده قورولور و بو دورت قول او قورولوشا دورت حيات اورگاني حسابلانير. بو دورت قولون بيرينجي سي تئوريسين لر دير – ايكينجي سي تئورونو پراكتيك حالا گئتيرمه يه امكان يارادان لار ( ضيالي لار ) – اوچونجوسو تئورونو پراكتيك حالا ساليب گوز اونونه گئتيره ن لر ( توپلوم ) و دوردونجو سو گئچميش اوچ قولون ساغلام چاليشمالارينا و فيكيرلشمه لرينه نظارت ائده ن عمومو شعور ( ميللي شعور ).
بير قورولوش دوغروسو بير اورگان كيمي چاليشير و مثال بير دامجي قان نه ساياق كي بو ارگان لاردا يارانير – دولانير – ايش گوسترير و يئني دن اوره يه قاييد يب و تصفيه اولوب و يئني دن دامارلارا و بوينوندا اولان گورو لره ساري قاييدير. ساغلام بير قورولوش ، توپلوم ، حركت ، جبهه ، پارتي ، تشكيلات ، جمعيت .....بو قرار اولمالي دير . هرهانسي دئدييميز قورولوش لار بو دورت چرچيوه ده اولمازسا ، او سينيق و سالخاق بير قورولوش دور و نه تك اوزو آياق اوسته دورا بيلمز بلكه ييخلديغي حالدا چوخلارينين باشينا آخيب و فلاكت لر يارادا بيلر .
تئوريسين لر البته كي آنادان دوغما تئوريسين اولا بيلمزلر . اونلار بسيط حالدا هر بير علمي اويره نيب و خصوصي له ياراتديغي تئوري حاققيندا علاقه لي علم لري داهادا دقيق بيلمه لي ديلر . ميللي حركت ده تئوري يازان لار گره ك كي : 1 – آذربايجان عمومو و تاريخي ديليني ( توركجه ) ياخشي جا بيلميش اولسون لار . 2 – آذربايجان بو گون و معاصر سوسيال دورومو حاققيندا گئنيش معلومات لاري اولسون . 3 – آذربايجان كولتور و مدنيت حاققيندا هر طرفلي معلومات لاري اولسون .4 – آذربايجان ژئوپولتيك دورومون ياخشي جا باشا دوشسون . 5 – آذربايجان اكونومو دورومون ، وارليق لارين ، يوخسوللوق لارين و ديگر علاقه لي قوللارين آيدين جا ايضاح ائده بيلسين . 6 – آذربايجان تاريخي حاققيندا دوغرو معلومات لاري اولسون . 7 – آذربايجان خالقيندا اولان چيخار ، ايسته ك ، اينام ، باشاري ، آماج ..... لاردان ياخشي جا بيلگي سي اولسون . 8 – آذربايجانين دونيا دوروموندا اولان يئريني دقيق جه بيلسين . 9 – بير ياخشي پسيكولوژيست اولاراق ، سوزو هارادان دئييب هارادا قورتارسين ، بيليب و عمل ائتسين .10 – چئوره ده گئده ن هر بير دئيشيك ليي آني ده آليب و بيلسين ........
ايكينجي قول ، تئورونو پراكتيك حالا گئتيرمه يه امكان يارادان آيدين لار و ضيالي لار بير طرف دن تئوريه اينانيب و اونو هر حالدا گوز اونونه آلاراق ، ديگر طرف دن اوز باشيناليق ائديب و [ مصلحت ] گوروب يئني نومايش لر گوسترمه ملي دير . ضيالي لار تئورونو يارادان بير قول اولاراق ، هر نه يئني بير دئيشيك ليي توپلوم حالدا و ديگرلر نظري له تئوري ده يارادا بيلرلر و تئوري له پراكتيك دورومو بير او قده ر اويقون لاشديرمالي ديلار كي هر بير حركت دوغرو سونونجا چاتسين بير ائيله كي ان آز ضررله ان چوخ فايداني الده ائتمك اولسون . ايكينجي قول دا [ شور ] و [ كاهيل ليك ] معناسي مطلق اولمامالي دير و هر نه دورومو اونون گرچك آچي لاريندان باخيب ، عيارلامالي ديلار . بو قول دا گئده ن ذره جه يالان و سهو ، ديگر قول لاردا بويوك بير فاجعه يه چئوريله بيلير ......
اوچونجو قول تئورونو پراكتيك حالا ساليب و گوز اونونه گئتيره ن توپلوم ، دئمك هر بير قورولوشون گوستري سي حسابلانير و هر بير قورولوش بو قول لا اوزونو تقديم ائدير . آنجاق بو قول دا جمعيت آرتيق اولدوغونا گوره و مئيدان داها گئنيش و هر طرفلي اولدوغونا گوره و ان مهم ، گوز اونونده اولدوغونا گوره ، هر بير ايش اولا بيلير . تنقيدلر ، تشويق لر ، تخريب لر ، تمجيدلر ، تكفيرلر ، تكريم لر.....و هر نه ريلكس لر بو قول دا اوزه چيخيب و دال با دال گورونور . آنجاق تئوري دوز يازيلديغي حالدا ، تئوري دوزگون پراكتيك دورومونا بيچيلديي حالدا ، بو قول دا گئده ن گوستري دقيق و دوزگون اولاجاق دير . آمما دئديميز كيمي مئيدان گئنيش اولدوقدا ، هر بير كس و ناكس بو مئيدانا داخيل اولوب و قورولوش آدي له مانورلار ياپا بيلير . بئله حالدا دوردونجو قول يعني گئچميش اوچ قولون ساغلام چاليشمالارينا و فيكيرلشمه لرينه نظارت ائده ن عمومو شعور و يا ميللي شعور اورتايا گلير .
بو قول تئوريسين لر و ضيالي لر و توپلوم دان سئچيلميش و سونا چاتميش كس لردن و فيكيرلردن عبارت اولان بير قول اولاراق ، بير ايتي گوز كيمي هر نه يي گوروب ، عيارلاييب و سون قراري يئني دن تئوريسين لره وئرمه لي دير . دئمك تصفيه ايشي بو دونوم ده گورونور . ايه ر تئوري ده بير آخساق ليق گورونورسه ، او ، يئني لنمه لي و بو دونه داها دقت لي يازيليب و ديگر قوللارا وئريلمه لي دير . ايه ر بو آخساق ليق ايكينجي قول يعني ضيالي لاردا ، آيدين لاردا و ايره لي ده گئده ن لرده وارسا ، اونلاري خبردار ائتمه لي و بو سهولرين باشا سالماق لازم گورونور . و ايه ر بو سهو و آخساقليق توپلوم دا گورونور ( چوخ آز امكان لا ) اونون ريسورسي آختاريليب و ترميم اولمالي دير . همين ايش كي قان دا اولان سلول لار گورورلر . بئله كي هر بير سهو دوشه ن فيكري و يا شخصي آرايا آليب و بير او قده ر چكيش له ييرلر تا نهايت اوزونده اولان پيسليك لري كنارا آتيب ، ساغلام دوروما گليب توپلوما قاووشسون و يا محو اولوب و آرادان گئتسين .
ميللي شعور آنا قارنيندان گلمه بير شعور دئييل . اونو چوخلو واسطه لرله يارادان لار و اويره دنلر واردير . بير توپلوم همين ميللي شعور واسطه سي له ايره لي گئدير و بو گئديش ده هرنه ضد و مخالف فيكيرلري گئري ده قويوب و مئيدان دان چيخارير . تصفيه ايله تسويه سوزلويو بو مئيداندا دوغرو معنا تاپير . فيكيرده گوده اولان مدعي لر ، دنيزده بوغولان كس كيمي هرنه چور – چوپه ال آتيب ، قورتولمايير لار كي هئچ ، بو ايش لرينده اوزلرين داها دا آرتيق رسواي ائديرلر . اونلار تسويه معناسين اوستون توتوب و بو يول دا بير بيريله چيرپيشيرلار.
اليميناسيون بير سوزده و بير معنادا يازيلير سا ، هر بير قورولوش دا چئشيدلي يوللارلا اجرا اولونور . بير دموكرات و مدني قورولوش دا اليميناسيون دانيشيق و مذاكره و مباحثه واسطه لري له ايره لي گئدير حالبوكي بير غير دموكرات و غير مدني قورولوش دا اليميناسيون يوموروق و چوماق لا معنالانير ! بو گون ايسه بيزه دوشه ن اليميناسيون دوردونجو قول واسطه سي له داها دوغرو معنا آليب و ايضاح لانير . بو گون ميللي شعور تصديق ائدير كي هانسي فيكير دوز و هانسي فيكير سهودير . ميللي حركت بوگون داها بير بالاجا سو گولو دئييل كي هر نه مير – ميلچك اونا قونوب و بهره لنسين . ميللي حركت بو گون بير دنيز ساياغي چيرپينير و هر نه در – گوهري باغرينا باساراق ديگر زير – زيبيل لري ساحل ده سولانان زيبيل ديلنجي لرينه بوراخير . بو دنيزه احتياط لا و حورمت له ياناشاق !

زهره وفايي

Zohre-az.blogspot.com
Zohre_az@yahoo.com